Ufgwachse bini uf der Oberlangenegg, nach mire Lehr zur Apothekerhälferin wie’s dennzumal het gheisse, bini scho gli i d’s Eriz züglet u dert fasch drissg Jahr bliebe. Während dere Zyt bini ghürate gsi u ha Muetter vo zwene Sühn dörfe wärde, was mi bis hüt sehr glücklech macht. Im 2009 hani dr Wäg zrügg i d‘Apothek gfunge u schaffe dert, im Backoffice, sehr gärn und engagiert.

Im 2012 bini zrügg uf d’Oberlangenegg  näbe d’Yschbahn z’wohne cho u sit 2018 natürlech o stouzi Nachbarin vor HotShot Arena worde.

Sit paarne Jahr bini sogar Grosi u sehr dankbar, dass ig miner Änkelchind darf gseh ufwachse und a ihrem Läbe teilnäh.

Gschriebe ha-n-i scho aus Ching gärn.. Chürzeschtgschichtli für mi chlini Schwoscht u speter die erschte Gedichtli… Zersch eifach so, zu verschiedene Aläss. Speter hani Gedichtcharte für d’Wiehnachtsustellig im Eriz härgsteut.

Im 2006 isch de mis erschte Gedichtbändli usecho, dank dr wunderbare Arbeit vor Sandra Burger.